ഇടുക്കി: മാങ്കുളത്ത് ദേഹത്തേക്ക് ചാടിവീണ പുലിയെ നാട്ടുകാർ തല്ലിക്കൊന്നു. ഇന്ന് രാവിലെയാണ് സംഭവം. രാവിലെ പുലിയെ നാട്ടുകാർ തല്ലിക്കൊന്നു എന്ന രീതിയിലായിരുന്നു റിപ്പോർട്ട്. എന്നാൽ പിന്നീടാണ് തന്നെ ആക്രമിച്ച പുലിയെ യുവാവ് വെട്ടുകയായിരുന്നെന്ന റിപ്പോർട്ട് പുറത്ത് വരുന്നത്.
അമ്പതാംമൈൽ ചിക്കണംകുടിയിലെ ഗോപാലനെന്ന ആളെ പുലി ആക്രമിച്ചപ്പോൾ വാക്കത്തി കൊണ്ട് വെട്ടുകയായിരുന്നു. കയ്യിലും കാലിലും പുലി കടിച്ചെന്നാണ് റിപ്പോർട്ട്. ഇയാൾ ആശുപത്രിയിൽ ചികിത്സയിലാണ്.
ഇന്നലെ രാത്രിയിൽ അമ്പതാം മൈലിൽ എത്തിയ പുലി രണ്ട് ആടുകളെയും കൊന്നിരുന്നു. കഴിഞ്ഞ കുറച്ചു നാളുകളായി മാങ്കുളം മേഖലയിൽ പുലിയുടെ ശല്യം ഉണ്ട്. പുലിയെ പിടിക്കാൻ വനം വകുപ്പ് കൂടി സ്ഥാപിച്ചിരുന്നു. ഇതിനിടയിലാണ് ഗോപാലനെ പുലി ആക്രമിച്ചത്.
അതേസമയം പുലിയെ വെട്ടിക്കൊന്ന സംഭവത്തില്‍ കേസെടുക്കില്ലെന്ന് വനംവകുപ്പ് പ്രതികരിച്ചു. സ്വയരക്ഷക്കായ് പുലിയെ കൊന്നതിനാല്‍ കേസെടുക്കേണ്ട ആവശ്യമില്ലെന്നാണ് വനം വകുപ്പിന്‍റെ വിശദീകരണം.
