ആലത്തൂര്‍: കുനിശ്ശേരിയിലെ സഹോദരിമാര്‍ ഹാന്‍ഡ് എംബ്രോയ്ഡറി നിര്‍മാണത്തില്‍ ഇന്ത്യന്‍ ബുക്ക് ഓഫ് റെക്കോർഡ്‌സില്‍ ഇടം നേടി.
കുനിശ്ശേരി നരിപ്പൊറ്റ ഹസ്സന്‍ മന്‍സിലില്‍ കെ.എസ്.ഇ.ബി റിട്ട. ഓവര്‍സിയര്‍ ഹസ്സന്‍കുട്ടിയുടെയും പാലക്കാട് ഡിവിഷനിലെ റെയില്‍വേ ഗാര്‍ഡ് ഷഹര്‍ ബാനുവിെന്‍റയും മക്കളായ സന്‍ഫിയ, ഹസ്ന എന്നിവര്‍ക്കാണ് ഈ നേട്ടം.
പാമ്പാടി നെഹ്റു കോളജില്‍ ബി. ആര്‍ക്ക് മൂന്നാം വര്‍ഷ വിദ്യാര്‍ത്ഥിനിയാണ് സന്‍ഫിയ. ഹസ്ന ആലത്തൂര്‍ ബി. എസ്. എസ് ഗുരുകുലം ഹയര്‍ സെക്കന്‍ഡറി സ്കൂളിലെ പ്ലസ്ടു വിദ്യാര്‍ഥിത്നിയും.
ഇന്ത്യയിലെ 14 രാഷ്ട്രപതിമാരുടെ പടം തുണിയില്‍ നൂല്‍കൊണ്ട് തുന്നി സന്‍ഫിയയും നൂല്‍കൊണ്ട് രണ്ട് ഇഞ്ച് വലിപ്പം മാത്രമുള്ള പാവ നിര്‍മിച്ച്‌ ഹസ്നയും ശ്രദ്ധേയരായി. മേല്‍ പറഞ്ഞ രണ്ടിനമാണ് റെക്കോർഡിന് കാരണമായതെങ്കിലും പല പാഴ് വസ്തുക്കളുമുപയോഗിച്ച്‌ ഒട്ടേറെ നിര്‍മാണങ്ങള്‍ ഇവര്‍ നടത്തിയിട്ടുണ്ട്. ഹൈസ്കൂള്‍ പഠനകാലത്ത് സംസ്ഥാന ശാസ്ത്രോത്സവത്തില്‍ വിവിധ നിര്‍മാണങ്ങള്‍ക്ക് എ ഗ്രേഡും നേടിയിട്ടുണ്ട്.
