കുഞ്ഞ് ജനിച്ച സന്തോഷത്തില്‍ പടക്കം പൊട്ടിച്ച്‌ ആഘോഷം നടത്തിയ യുവാവ് അറസ്റ്റില്‍. ദുബായ് സ്വദേശിയായ യുവാവാണ് അറസ്റ്റിലായിരിക്കുന്നത്. ആഘോഷത്തില്‍ ഒപ്പമുണ്ടായിരുന്ന ഇയാളുടെ രണ്ട് സുഹൃത്തുക്കളും അറസ്റ്റിലായിട്ടുണ്ട്. പടക്കങ്ങള്‍ ഒളിപ്പിച്ചു വച്ചു എന്നാരോപിച്ചാണ് ഇവരുടെ അറസ്റ്റ്.
ദുബായ് ഊദ് അല്‍ മുത്തീനയിലാണ് സംഭവം. അച്ഛനായതിന്‍റെ സന്തോഷം പടക്കം പൊട്ടിച്ചും കരിമരുന്ന് പ്രയോഗം നടത്തിയുമാണ് യുവാവ് ആഘോഷിച്ചത്. ഇതിനിടെ തീ പടരുകയും അയല്‍പക്കത്തെ അഞ്ച് വീടുകളുടെ പൂമുഖവും അവിടെ നിര്‍ത്തിയിട്ടിരുന്ന വാഹനങ്ങളും അഗ്നിക്കിരയാവുകയുമായിരുന്നു. പിന്നാലെയാണ് യുവാവിനെ ദുബായ് പൊലീസ് അറസ്റ്റ് ചെയ്തത്.
ഊദ് അള്‍ മുത്തീന മേഖലയില്‍ സ്ഫോടനമുണ്ടായി എന്ന റിപ്പോര്‍ട്ട് ഫയല്‍ ചെയ്യപ്പെട്ടിരുന്നു. പൊലീസും സിവില്‍ ഡിഫന്‍സ് ടീമും ആംബുലന്‍സ് സേവനങ്ങളും ഉടന്‍ തന്നെ സ്ഥലത്തെത്തി എന്നാണ് അല്‍ ഖ്വാസൈസ് പൊലീസ് സ്റ്റേഷന്‍ ഡയറക്ടര്‍ ബ്രിഗേഡിയര്‍ ജനറല്‍ അബ്ദുള്‍ ഹാലിം അല്‍ ഹഷ്മി അറിയിച്ചത്. തീ ഉടന്‍ തന്നെ അണയ്ക്കുകയും യുവാവിനെയും പടക്കങ്ങള്‍ ഒളിപ്പിക്കാന്‍ കൂട്ടു നിന്ന സുഹൃത്തുക്കളെയും അറസ്റ്റ് ചെയ്യുകയും ചെയ്തു എന്നു അദ്ദേഹം അറിയിച്ചിട്ടുണ്ട്.
