അക്കൗണ്ടുകള്‍ ഹാക്ക് ചെയ്ത് പണംതട്ടല്‍; പോലീസ് വിരിച്ച വലയിൽ കുടുങ്ങിയത് ‘വമ്പൻ സ്രാവ്’! മിസ്റ്റീരിയസ് ഹാക്കേഴ്‌സ് ഗ്രൂപ്പ് അഡ്മിന്‍ അറസ്റ്റില്‍
മലപ്പുറം: അക്കൗണ്ടുകള്‍ ഓണ്‍ലൈനിലൂടെ ഹാക്ക് ചെയ്ത് പണംതട്ടല്‍ പതിവാക്കിയ ‘മിസ്റ്റീരിയസ് ഹാക്കേഴ്‌സ്’ ഗ്രൂപ്പിൻ്റെ അഡ്മിന്‍ അറസ്റ്റില്‍. മഹാരാഷ്ട്ര നന്ദേദ് സ്വദേശിയായ ഓംകാര്‍ സഞ്ചയ് ചതര്‍വാഡ് (20) ആണ് പിടിയിലായത്. മലപ്പുറം മഞ്ചേരി സ്വദേശിയുടെ പരാതിയിൽ മഹാരാഷ്ട്രയിലെ നന്ദേദില്‍ നിന്നാണ് പ്രതിയെ മഞ്ചേരി പോലീസ് അറസ്റ്റു ചെയ്തത്.
ബാങ്ക് അക്കൗണ്ടുകളും, ഭീം, ആമസോണ്‍, ഫ്ലിപ്പ് കാര്‍ട്ട് ഉള്‍പ്പെടെയുള്ള വിവിധ ഓണ്‍ലൈന്‍ പേയ്‌മെന്റ് സംവിധാനങ്ങളും ഹാക്ക് ചെയ്ത് പണം തട്ടിവരികയായിരുന്നു ‘മിസ്റ്റീരിയസ് ഹാക്കേഴ്‌സ്’ ഗ്രൂപ്പ്. മഞ്ചേരി സ്വദേശിയുടെ സ്റ്റേറ്റ് ബാങ്ക് ഓഫ് ഇന്ത്യ അക്കൗണ്ടില്‍ നിന്നും ഒരു ലക്ഷത്തിലേറെ രൂപ ഹാക്ക് ചെയ്ത കേസിലാണ് അഡ്മിനെ മഞ്ചേരി പോലീസ് അറസ്റ്റു ചെയ്തത്.
കഴിഞ്ഞ ഒക്ടോബര്‍ മാസം 12 തീയതിയാണ് കേസിനാസ്പദമായ സംഭവം. കാലത്ത് ഉറക്കമുണര്‍ന്ന പരാതിക്കാരൻ്റെ മൊബൈല്‍ ഫോണില്‍ തൻ്റെ ബാങ്ക് അക്കൗണ്ടില്‍ നിന്നും ചെറിയ ചെറിയ സംഖ്യകളായി പണം ട്രാന്‍സ്ഫര്‍ ചെയ്യപ്പെട്ടത് സംബന്ധിച്ച മെസേജുകള്‍ കണ്ട് അക്കൗണ്ട് സ്റ്റേറ്റ്‌മെൻ്റ് എടുത്ത് പരിശോധിച്ചപ്പോഴാണ് ഒരു ലക്ഷത്തിലേറെ രൂപ നഷ്ടപ്പെട്ടതായി മനസിലായത്. തുടര്‍ന്ന് ഇയാളുടെ പരാതിയിൽ മഞ്ചേരി പോലീസ് കേസ് രജിസ്റ്റര്‍ ചെയ്ത് അന്വേഷണം നടത്തിവരവെയാണ് പ്രതി പിടിയിലാകുന്നത്. കൂട്ടാളികൾ അറസ്റ്റിലായതോടെ പ്രതി ഒളിവിലായിരുന്നു. കേസില്‍ നേരിട്ട് ബന്ധമുള്ള താനെ സ്വദേശി ഭരത് ഗുര്‍മുഖ് ജെതാനി (20), നവി മുംബൈ സ്വദേശി ക്രിസ്റ്റഫര്‍ (20) എന്നിവരെ കഴിഞ്ഞ നവംമ്പറിൽ മഞ്ചേരി പോലീസ് മുംബൈയില്‍ നിന്നും അറസ്റ്റു ചെയ്തിരുന്നു.
വിവിധ ഫിഷിങ് വെബ്‌സൈറ്റുകള്‍ ഉപയോഗിച്ച് വ്യക്തികളുടെ ഇൻ്റര്‍നെറ്റ് ബാങ്കിംഗ് യൂസര്‍ ഐഡിയും പാസ് വേഡും ക്രാക്ക് ചെയ്യുന്ന പ്രതികള്‍ പിന്നീട് അതുവഴി അക്കൗണ്ടിലെ പണം ഹാക്ക് ചെയ്യുകയായിരുന്നു. ഈ പണം ഉപയോഗിച്ച് ഗിഫ്റ്റ് വൗച്ചറുകളും വ്യാജ വിലാസങ്ങള്‍ നൽകി വസ്തുക്കള്‍ വാങ്ങുകയുമാണ് ചെയ്യുന്നത്. ഇത്തരത്തില്‍ വാങ്ങുന്ന ഗിഫ്റ്റ് വൗച്ചറുകള്‍ ഓണ്‍ലൈന്‍ വഴി വിൽപന നടത്തിയാണ് പ്രതികള്‍ പണമാക്കി മാറ്റുന്നത്. നേരിട്ട് പണമാക്കി മാറ്റിയാല്‍ എളുപ്പത്തില്‍ പിടിക്കപ്പെടാം എന്നതിനാലാണ് ഇത്തരത്തില്‍ സമര്‍ഥമായി കാര്യങ്ങള്‍ ചെയ്യുന്നത്. ആമസോണ്‍, ഫ്ലിപ്പ് കാര്‍ട്ട് തുടങ്ങിയ ഇ-വാലറ്റ് അക്കൗണ്ടുകള്‍ ഹാക്ക് ചെയ്ത് ഗിഫ്റ്റ് വൗച്ചറുകള്‍ നേരിട്ട് തട്ടിയെടുക്കുന്നുമുണ്ട്. ഇതര വ്യക്തികളുടെ തിരിച്ചറിയല്‍ രേഖകള്‍ ഉപയോഗിച്ച് എടുത്ത സിം കാര്‍ഡുകളും വ്യാജ ഐപി വിലാസങ്ങളും ഉപയോഗിച്ചാണ് ഇവര്‍ ഹാക്കിങ് നടത്തിവന്നിരുന്നത്.
ഏറെ നാളത്തെ ശ്രമകരമായ നീക്കത്തിലൂടെയാണ് പ്രതികളെ പോലീസ് തിരിച്ചറിഞ്ഞത്. ഇതിനായി പോലീസ് സംഘം കഴിഞ്ഞ ഒരു മാസത്തോളമായി മധ്യപ്രദേശ്, പഞ്ചാബ്, ഹരിയാന, മഹാരാഷ്ട്ര തുടങ്ങിയ സംസ്ഥാനങ്ങളിലായി പ്രതിയുടെ നീക്കങ്ങള്‍ നിരീക്ഷിച്ച് താമസിച്ചുവരികയായിരുന്നു. ഹാക്കിങിലൂടെ സമ്പാദിക്കുന്ന പണം ഉപയോഗിച്ച് ആഡംബര ജീവിതമാണ് പ്രതികള്‍ നയിച്ചിരുന്നത്. നിലവിൽ അറസ്റ്റിലായ പ്രതിയാണ് തട്ടിപ്പിനാവശ്യമായ ഓണ്‍ലൈന്‍ അക്കൗണ്ടുകള്‍ ഓപ്പറേറ്റ് ചെയ്യുന്നത്. അര്‍ധരാത്രിക്ക് ശേഷം പുലര്‍ച്ചെ വരെയുള്ള സമയങ്ങളിലാണ് പ്രതികള്‍ അക്കൗണ്ടില്‍ നിന്നും പണം ഹാക്ക് ചെയ്യുന്നത്. പണം ട്രാന്‍സ്ഫര്‍ ചെയ്യുന്നത് സംബന്ധിച്ച മെസേജുകള്‍ ലഭിക്കുകയാണെങ്കില്‍ ഇരകള്‍ അത് അറിയരുതെന്നതിനാലാണ് പുലര്‍ച്ചെ സമയങ്ങള്‍ ഇവര്‍ തെരെഞ്ഞെടുക്കുന്നത്. ഹാക്കിങ് ടൂള്‍സ്, ഹാക്ക് ചെയ്ത വിവരങ്ങള്‍ മുതലായവ ഷെയര്‍ ചെയ്യാനായി ഇവര്‍ ക്രിയേറ്റ് ചെയ്ത ‘മിസ്റ്റീരിയസ് ഹാക്കേഴ്‌സ്’ ഗ്രൂപ്പില്‍ ഹാക്ക് ചെയ്ത നിരവധി വ്യക്തികളുടെ യൂസര്‍ ഐഡികളും പാസ് വേഡുകളും ഷെയര്‍ ചെയ്തതായി കണ്ടെത്തിയിട്ടുണ്ട്.
നിരവധി ബാങ്ക് അക്കൗണ്ടുകളില്‍ നിന്നും, ഇ-വാലറ്റുകളില്‍ നിന്നും ഇവര്‍ പണം ഹാക്ക് ചെയ്തതായി സൂചനകള്‍ ലഭിച്ചിട്ടുണ്ട്. സംഘത്തില്‍ കൂടുതല്‍ ആളുകള്‍ ഉള്‍പ്പെട്ടിട്ടുണ്ടോ എന്ന് പോലീസ് പരിശോധിച്ചുവരികയാണ്. കൊച്ചി തൃക്കാക്കരയിലും ഹരിയാന ഫരീദാബാദിലും പ്രതികൾക്കെതിരെ സമാന കേസുകള്‍ രജിസ്റ്റർ ചെയ്തിട്ടുണ്ട്.
