ന്യൂ ഡൽഹി: എസ്എൻസി ലാവ്‍ലിൻ കേസുമായി ബന്ധപ്പെട്ട ഹർജികൾ സെപ്റ്റംബർ 13 ന് സുപ്രീംകോടതി പരിഗണിക്കും. മുഖ്യമന്ത്രി പിണറായി വിജയനെ കുറ്റവിമുക്തനാക്കിയതിന് എതിരായ സിബിഐയുടെ അപ്പീലാണ് സുപ്രീംകോടതി പരിഗണിക്കുക. നേരത്തെ ഓഗസ്റ്റ് 22 ന് കേസ് പരിഗണിക്കുമെന്നായിരുന്നു സുപ്രീംകോടതിയുടെ വെബ്സൈറ്റിൽ രേഖപ്പെടുത്തിയിരുന്നത്. ഇത് പിന്നീട് സെപ്റ്റംബർ 13 ലേക്ക് മാറ്റുകയായിരുന്നു. 13 നു പരിഗണിക്കുന്ന കേസുകളുടെ പട്ടികയിൽ നിന്നും ലാവ്‍ലിൻ കേസുമായി ബന്ധപ്പെട്ട ഹർജികൾ നീക്കം ചെയ്യരുതെന്ന് ജസ്റ്റിസ് യു യു ലളിത് അധ്യക്ഷനായ ബെഞ്ചിൻ്റെ നിർദേശമുണ്ട്. അഭിഭാഷകയായ എം കെ അശ്വതിയുടെ ഇടപെടലിനെ തുടർന്നാണ് സുപ്രീംകോടതിയുടെ നിർദേശം.
കഴിഞ്ഞ നാലു വർഷത്തിനിടെ 30 ലേറെ തവണയാണ് എസ്എൻസി ലാവ്‍ലിൻ കേസുമായി ബന്ധപ്പെട്ട ഹർജികൾ പരിഗണിക്കുന്നത് മാറ്റിവെച്ചിരുന്നത്. ഹർജി തുടർച്ചായി മാറ്റിവെക്കുന്നത് അഭിഭാഷക എം കെ അശ്വതി സുപ്രീംകോടതിയുടെ ശ്രദ്ധയിൽപ്പെടുത്തുകയായിരുന്നു. ഇതേ തുടർന്നാണ് 13 ന് പരിഗണിക്കുന്ന കേസുകളുടെ പട്ടികയിൽ നിന്നും ലാവ്‍ലിൻ കേസ് നീക്കം ചെയ്യരുതെന്ന നിർദേശമുണ്ടായത്.
സുപ്രിംകോടതിയില്‍
മുഖ്യമന്ത്രി പിണറായി വിജയൻ ഉൾപ്പെടെയുള്ളവരെ പ്രതിപ്പട്ടികയിൽ നിന്ന് ഹൈക്കോടതി ഒഴിവാക്കിയതിനെതിരെയാണ് സിബിഐ സുപ്രീംകോടതിയെ സമീപിച്ചത്. 2018 ജനുവരിയിലാണ് സുപ്രീംകോടതി നോട്ടീസ് അയച്ചിരുന്നത്. ഇതിനുശേഷം പല തവണ കേസ് മാറ്റിവെക്കുകയായിരുന്നു. കേസുമായി ബന്ധപ്പെട്ട ഹർജികൾ ജസ്റ്റിസ് യു യു ലളിത് ആയിരുന്നു പരിഗണിച്ചിരുന്നത്. കേസ് ഇനി ലിസ്റ്റ് ചെയ്തിരിക്കുന്ന ദിവസം ജസ്റ്റിസ് യു യു ലളിത് ആയിരിക്കും ചീഫ് ജസ്റ്റിസ്. യു യു ലളിതിൻ്റെ ബെഞ്ച് തന്നൊയാണോ കേസ് പരിഗണിക്കുക എന്ന കാര്യത്തിൽ വ്യക്തതയില്ല
