കൊച്ചി: നെട്ടൂരില്‍ ഭാര്യയുമായി അടുപ്പമുണ്ടെന്ന സംശയത്തെ തുടര്‍ന്ന് ഭര്‍ത്താവ് യുവാവിനെ കൊലപ്പെടുത്തിയത് അതിക്രൂരമായി. എറണാകുളം നെട്ടൂരിലെ പച്ചക്കറി മാര്‍ക്കറ്റിന് സമീപമാണ് കൊലപാതകം നടന്നത്. പാലക്കാട് സ്വദേശികളാണ് കൊല്ലപ്പെട്ടയാളും പ്രതിയായ യുവാവും. പാലക്കാട് പിരായിരി സ്വദേശിയാണ് കൊല്ലപ്പെട്ട അജയ് കുമാര്‍. കൊലപാതകത്തിന്റെ സിസിടിവി ദൃശ്യങ്ങൾ പുറത്ത് വന്നിട്ടുണ്ട്. പ്രതി സുരേഷ് അജയ് കുമാറിനെ ഹോട്ടല്‍ മുറിയില്‍ നിന്നും വിളിച്ചിറക്കിക്കൊണ്ട് വന്ന് മര്‍ദ്ദിക്കുന്നതും ഓടി രക്ഷപെടാന്‍ ശ്രമിക്കുന്ന അജസ് കുമാറിനെ പിന്തുടരുന്നതുമെല്ലാം ദൃശ്യങ്ങളില്‍ വ്യക്തമാണ്. പ്രതി സുരേഷ് കുമാര്‍ അറസ്റ്റിലായിട്ടുണ്ട്. കൊലപാതകത്തിന്റെ കൂടുതല്‍ വിവരങ്ങള്‍ ശേഖരിച്ച് വരികയാണ് പോലീസ്.
ഞെട്ടിച്ച് കൊലപാതകം
യുവാവിനെ തലയ്ക്കടിക്ക് കൊലപ്പെടുത്തിയ വാര്‍ത്ത കേട്ടതിന്റെ ഞെട്ടലിലാണ് നെട്ടൂര്‍ നിവാസികള്‍. ആസൂത്രിതമായാണ് സുരേഷ് കൊലപാതകം നടത്തിയതെന്നാണ് സിടിസിടി ദൃശ്യങ്ങളില്‍ നിന്നും വ്യക്തമാകുന്നത്. അജയ് കുമാറിന്റെ മരണം ഉറപ്പിക്കുന്നതുവരെ സുരഷ് മര്‍ദ്ദനം തുടര്‍ന്നു. സുരേഷിന്റെ മര്‍ദ്ദനത്തില്‍ അജയ് കുമാര്‍ തളര്‍ന്നു വീണു. അല്‍പ്പസമയം കഴിഞ്ഞ് ഇവിടെ നിന്നും രക്ഷപെടാന്‍ ശ്രമിക്കുന്നതിനിടെ തളര്‍ന്നുവീണു. ഇതു കണ്ട സുരേഷ് പിന്നാലെയെത്തി വീണ്ടും മര്‍ദ്ദിക്കുകയായിരുന്നു. പുലര്‍ച്ചെ ഒരു മണിയോടെയാണ് കൊലപാതകം നടന്നത്.
ഭാര്യയുമായി അടുപ്പം
സ്വകാര്യ ഗ്യാസ് എജന്‍സിയിലെ ജീവനക്കാരനായിരുന്നു സുരേഷെന്നാണ് വിവരം. സ്വകാര്യ ആശുപത്രിയിലെ ഇന്‍ഷുറന്‍സ് വിഭാഗത്തിലെ ജീവനക്കാരിയായിരുന്നു ഭാര്യ. യുവതിയും അജയ് കുമാറുമായി അടുപ്പമുണ്ടായിരുന്നുവെന്നാണ് പോലീസ് പറയുന്നത്. അജയ് കുമാര്‍ നെട്ടൂരിലുള്ള വിവരം അറിഞ്ഞ് സുരേഷ് പാലക്കാട് നിന്നും നെട്ടൂരില്‍ എത്തുകയായിരുന്നു. ഇതിനിടെ രാത്രി കാണണെന്ന് ആവശ്യപ്പെട്ട് ഭാര്യയെക്കൊണ്ട് അജയ് കുമാറിനെ സുരേഷ് വിളിപ്പിക്കുകയായിരുന്നു. തുടര്‍ന്ന് ഭാര്യയെ കാറിലിരുത്തിയ ശേഷം സുരേഷ് അജയ് കുമാറിനെ കാണാനെത്തി. ഇരുവരും തമ്മില്‍ വാക്ക് തര്‍ക്കമുണ്ടാവുകയായിരുന്നു.
തലയ്ക്കടിച്ച് കൊലപ്പെടുത്തി
തുണിയില്‍ പൊതിഞ്ഞ് കൈയ്യില്‍ കരുതിയ വീല്‍ സ്പാനര്‍ ഉപയോഗിച്ചായിരുന്നു സുരേഷ് അജയിയെ മര്‍ദ്ദിച്ചത്. യുവാവ് അവശനിലയില്‍ റോഡില്‍ കിടക്കുന്നത് കണ്ട നാട്ടുകാര്‍ വിവരം പോലീസിനെ അറിയിക്കുകയായിരുന്നു. തുടര്‍ന്ന് പോലീസെത്തി യുവാവിനെ ആശുപത്രിയിലേക്ക് മാറ്റിയെങ്കിലും ജീവന്‍ രക്ഷിക്കാനായില്ല. സുരേഷ് കുമാറിനെ ചോദ്യം ചെയ്യലിന് ശേഷം കോടതിയില്‍ ഹാജരാക്കും. സുരേഷിന്റെ ഭാര്യയും പോലീസ് കസ്റ്റഡിയിലുണ്ട്. തന്നെ കാണാനാണ് അജയ് കുമാര്‍ എത്തിയതെന്ന് യുവതി സമ്മതിച്ചിട്ടുണ്ട്. സുഹൃത്തുക്കളാണെന്നും കടം വാങ്ങിയ പണം നല്‍കാന്‍ എത്തിയതാണെന്നുമാണ് യുവതി പറയുന്നത്.
