തിരുവനന്തപുരം: വര്‍ക്കലയിലെ നവവധുവിന്റെ മരണ വാര്‍ത്ത കേട്ടതിന്റെ ഞെട്ടലിലാണ് അയല്‍ക്കാരും ബന്ധുക്കളും. 3 മാസം മുമ്പാണ് ആലപ്പുഴ സ്വദേശിയായ നിഖിതയുടെയും അനീഷിന്റെയും വിവാഹം കഴിഞ്ഞത്. അനീഷിന്റെ സംശയങ്ങളാണ് നിഖിതയെ കൊലപ്പെടുത്തുന്ന നിലയിലേക്ക് കാര്യങ്ങള്‍ എത്തിച്ചതെന്നാണ് പ്രാഥമിക നിഗമനം. ചൊവ്വാഴ്ച പുലര്‍ച്ചയോടെയാണ് അനീഷ് കൊലപാതകം നടത്തിയത്. സംഭവ സമയം വര്‍ക്കല അയന്തിയിലെ അനീഷിന്റെ വീട്ടിലായിരുന്നു ഇരുവരും.
3 മാസം മുമ്പ് വിവാഹം
3 മാസങ്ങള്‍ക്ക് മുമ്പ് ജൂലൈ എട്ടാം തീയതിയായിരുന്നു 35കാരനായ അനീഷും 26കാരിയായ നിഖിതയും വിവാഹിതരായത്. അനീഷിന് വിദേശത്തായിരുന്നു ജോലി. വിവാഹ ശേഷം വിദേശത്തേയ്ക്ക് പോയ ദമ്പതികള്‍ 10 ദിവസം മുമ്പാണ് നാട്ടിലേക്ക് മടങ്ങി. അനീഷിന്റെ കാലുവേദനയുടെ ചികിത്സയ്ക്കായാണ് ഇവര്‍ നാട്ടിലേക്ക് മടങ്ങി വന്നത്. ഇരുവര്‍ക്കും ഇടയില്‍ വഴക്കും തര്‍ക്കവും പതിവായിരുന്നുവെന്നാണ് സൂചന. പോലീസ് അനീഷിന്റെ അറസ്റ്റ് രേഖപ്പെടുത്തിയിട്ടുണ്ട്.
നിലവിളക്ക് കൊണ്ട് കൊലപാതകം
അനീഷിന് നിഖിതയെക്കുറിച്ചുള്ള സംശയങ്ങളായിരുന്നു ഇരുവരും തമ്മിലുള്ള വഴക്കിന് കാരണമായിരുന്നത്. കൊലപാതകം നടന്നതിന്റെ തലേദിവസം രാത്രിയും ഇരുവരും തമ്മില്‍ വഴക്കുണ്ടായി. തര്‍ക്കം രൂക്ഷമായതോടെ പുലര്‍ച്ചയ്ക്ക് അനീഷ് നിഖിതയെ കൊലപ്പെടുത്തുകയായിരുന്നു. നിലവിളക്ക് കൊണ്ട് തലയ്ക്ക് അടിച്ചും വയറില്‍ കുത്തിയുമാണ് കൊലപാതകം നടത്തിയതെന്നാണ് പ്രാഥമിക വിവരം. നിഖിതയെ ഉടന്‍ തന്നെ വര്‍ക്കല താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
അന്വേഷണത്തിന് പോലീസ്
നിഖിതയുടെ മരണത്തില്‍ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ഭര്‍ത്താവ് അനീഷിന്റെ അറസ്റ്റ് രേഖപ്പെടുത്തിയിട്ടുണ്ട്. സംഭവ സമയം അനീഷിന്റെ ബന്ധുക്കളും വീട്ടില്‍ ഉണ്ടായിരുന്നതായാണ് വിവരം, ഇവരെയും പോലീസ് വിശദമായി ചോദ്യം ചെയ്‌തേക്കും. മകളുടെ വിയോഗ വാര്‍ത്ത അറിഞ്ഞ് നിഖിതയുടെ ബന്ധുക്കള്‍ വര്‍ക്കലയില്‍ എത്തിയിട്ടുണ്ട്. ഇവരില്‍ നിന്നും പോലീസ് വിവരങ്ങള്‍ ശേഖരിക്കും. കൊലപാതകത്തിന് പിന്നില്‍ മറ്റ് കാരണങ്ങള്‍ ഉണ്ടോയെന്നും അന്വേഷിച്ച് വരികയാണ്. നിഖിതയുടെ മൃതദേഹം പോസ്റ്റ് മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുനല്‍കും.
