കോഴിക്കോട്: പന്തീരങ്കാവ് പുന്നയൂര്‍ക്കുളം സ്വദേശി അബ്ദുള്‍ അബ്ദുൽ നാസറിനെ പ്രഭാത സവാരിക്കിടെ നായ കടിക്കുകയും കടിച്ച നായയെ ശക്തമായി പ്രതിരോധിച്ച്‌ നാസർ കീഴടക്കുകയും ചെയ്തത് വലിയ വാർത്തയായി മാറിയിരുന്നു. ഇപ്പോഴിതാ നാസറിനെ കടിച്ചതിന് പിന്നാലെ ശനിയാഴ്ച രാവിലെ നായ ചത്തിരുന്നു.
പ്രദേശവാസിയുടെ വളര്‍ത്തുനായ ആയിരുന്നു നാസറിനെ കടിച്ചത്. നാസറിനെ കൂടാതെ നായയുടെ ഉടമയ്‌ക്കും നേരത്തെ കടിയേറ്റിരുന്നു. നാസറിന് കടിയേറ്റ ദിവസം അതിസാഹസികമായി അദ്ദേഹം നായയെ കീഴ്‌പ്പെടുത്തിയില്ലായിരുന്നെങ്കില്‍ തൊട്ടുപിന്നാലെ കൂടുതല്‍ പേര്‍ക്ക് കടി കിട്ടുമായിരുന്നുവെന്നാണ് നാട്ടുകാരുടെ പ്രതികരണം.
ഇപ്പോള്‍ നായയ്‌ക്ക് പേവിഷ ബാധ സ്ഥിരീകരിച്ചതോടെ നായയുമായി അടുത്തിടപഴകിയ എല്ലാവരും പ്രതിരോധ കുത്തിവെപ്പ് എടുക്കേണ്ടതായി വരുമെന്നാണ് അധികൃതര്‍ അറിയിക്കുന്നത്. നാസര്‍ നായയെ കീഴ്‌പ്പെടുത്തിയപ്പോള്‍ സഹായത്തിനായി നാട്ടുകാരും എത്തിയിരുന്നു. ഈ ഘട്ടത്തില്‍ നായയുമായി സമ്ബര്‍ക്കത്തിലേര്‍പ്പെട്ട എല്ലാ പ്രദേശവാസികളും കുത്തിവെപ്പ് സ്വീകരിക്കേണ്ടതായി വരും.
