ചോരക്കുഴിയില്‍ കാറുകള്‍ കൂട്ടിയിടിച്ച്‌ കാര്‍ യാത്രക്കാരി തിരുവനന്തപുരം കുന്നത്ത് ആലീസ് കുര്യന്‍ (64, തിരുവനന്തപുരം ലേബര്‍ കമ്മിഷന്‍ ഓഫിസ് റിട്ട ജീവനക്കാരി) മരിച്ചു. ആലീസിന്റെ ഭര്‍ത്താവ് കുര്യന്‍ ഓടിച്ചിരുന്ന കാറാണ് അപകടത്തില്‍പ്പെട്ടത്. ഇന്നലെ ഉച്ചയ്ക്ക് 1.45 നായിരുന്നു അപകടം.
തിരുവനന്തപുരത്തുനിന്ന് കൂത്താട്ടുകുളത്തേക്ക് വരുകയായിരുന്ന കാര്‍ ചോരക്കുഴി വി.റ്റി.ജേക്ക് സമീപം കൂത്താട്ടുകുളം ഭാഗത്തുനിന്ന് വന്ന കാറില്‍ ഇടിക്കുകയായിരുന്നു. കാറില്‍ ഉണ്ടായിരുന്ന വില്ലൂന്നി സ്വദേശികളായ തോപ്പില്‍ അജോ ചെറിയാന്‍ (40), ഭാര്യ സുനി (35) എന്നിവര്‍ക്ക് കൈയ്ക്ക് പരിക്കേറ്റു. ആലീസിന്റെ ഭര്‍ത്താവ് കുര്യന്‍ (70) നിസാര പരിക്കുകളോടെ രക്ഷപ്പെട്ടു. അപകടത്തില്‍പ്പെട്ടവരെ കൂത്താട്ടുകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
