തിരുവനന്തപുരം: കൂട്ടുകാര്‍ക്കൊപ്പം മത്സരിച്ച്‌ മദ്യപിച്ച്‌ അവശനിലയിലായ പ്ലസ്ടു വിദ്യാര്‍ത്ഥി ആശുപത്രിയില്‍.നഗരത്തിലെ വിവിധ സ്‌കൂളുകളില്‍ നിന്നുള്ള ഏഴ് വിദ്യാര്‍ത്ഥികളാണ് ആല്‍ത്തറ ജംഗ്ഷനില്‍ നിര്‍മാണത്തിലുള്ള വീട്ടിലിരുന്ന് മദ്യപിച്ചത്.
സ്‌കൂളില്‍ ഓണാഘോഷമായിരുന്നതിനാല്‍ വിദ്യാര്‍ത്ഥികള്‍ യൂണിഫോമിലായിരുന്നില്ല ഉണ്ടായിരുന്നത്. മുണ്ടും ഷര്‍ട്ടുമായിരുന്നു വേഷം. പ്ലാമൂടുള്ള ബെവ്‌കോ ഔട്ലെറ്റില്‍ നിന്നാണ് മദ്യം വാങ്ങിയത്. മുണ്ടും ഷര്‍ട്ടും ധരിച്ചെത്തിയതിനാല്‍ തന്നെ ഇവര്‍ വിദ്യാര്‍ത്ഥികളാണെന്ന് ബെവ്‌കോ ജീവനക്കാര്‍ക്ക് മനസിലായില്ലെന്നാണ് ലഭിക്കുന്ന സൂചന.
വിദ്യാര്‍ഥികള്‍ പരസ്പരം മത്സരിച്ച്‌ മദ്യപിക്കുകയും അരക്കുപ്പി മദ്യം വെള്ളമൊഴിക്കാതെ കുടിച്ച വിദ്യാര്‍ത്ഥി കുഴഞ്ഞു
വീഴുകയായിരുന്നുവെന്നാണ് വിവരം. അഞ്ചുപേര്‍ ഓടി രക്ഷപ്പെട്ടു. ഒപ്പമുണ്ടായിരുന്ന മറ്റൊരു വിദ്യാര്‍ത്ഥിയാണ് മ്യൂസിയം പൊലീസില്‍ വിവരമറിയിച്ചത്. പൊലീസെത്തിയാണ് വിദ്യാര്‍ത്ഥിയെ മെഡിക്കല്‍ കോളജിലേക്ക് മാറ്റിയത്.
അവശനിലയിലുള്ള വിദ്യാര്‍ത്ഥി തീവ്രപരിചരണ വിഭാഗത്തില്‍ ചികിത്സയിലാണ്. സംഭവത്തില്‍ മ്യൂസിയം പൊലീസ് പ്രാഥമിക അന്വേഷണം നടത്തുന്നു. കേസെടുത്തിട്ടില്ല. ബെവ്‌കോയില്‍ നിന്ന് വിദ്യാര്‍ത്ഥികള്‍ക്ക് എങ്ങനെ മദ്യം ലഭിച്ചുവെന്നതിനെക്കുറിച്ചും അന്വേഷിക്കും.
