റിയാദ്: നന്മ കരുനാഗപ്പള്ളി പ്രവാസി കൂട്ടായ്മയുടെ ഈ വർഷത്തെ ഹ്യൂമാനിറ്റി ഐക്കൺ പുരസ്കാരത്തിന് പ്രവാസി സംരഭകയും ജീവകാരുണ്യ പ്രവർത്തകയുമായ ശ്രീമതി റഹ്മത്ത് അഷ്റഫ് വെള്ളപ്പാടത്തിനെ തെരഞ്ഞെടുത്തു. പ്രവാസ ലോകത്തെ മികച്ച ജീവകാരുണ്യ സാമൂഹിക സേവനങ്ങൾക്ക് നന്മ നൽകി വരുന്നതാണ് ഈ ആദരവ്.
കോവിഡ് കാലത്തും തുടർന്നും നടത്തി വരുന്ന വിവിധ സേവന പ്രവർത്തനങ്ങളെ മുൻനിർത്തിയാണ് അവാർഡ് ജേതാവിനെ തെരഞ്ഞെടുത്തതെന്ന് നന്മ ഭാരവാഹികൾ അറിയിച്ചു.
ഇപ്പോൾ റിയാദ് കെ.എം.സി.സി വനിതാ വിംഗ് പ്രസിഡൻ്റായി പ്രവർത്തിച്ച് വരികയാണ് റഹ്മത്ത് അഷ്റഫ്. പ്രമുഖ സാമൂഹിക പ്രവർത്തകരായ അഷ്റഫ് താമരശ്ശേരിയും സിദ്ധീഖ് തുവ്വൂരും മുൻ വർഷങ്ങളിൽ പുരസ്കാരത്തിന് അർഹരായിട്ടുണ്ട്.
സാമൂഹ്യ പ്രതിബദ്ധതയുള്ള സംരഭകർക്കായി പുതിയതായി ഏർപ്പെടുത്തിയ നന്മ ബിസിനസ്സ് ഐക്കൺ പുരസ്കാരം മുനീർ കണ്ണങ്കരയ്ക്ക് നൽകുന്നതാണ്. കൂട്ടായ്മയുടെ ഭാഗമായി വിവിധ പ്രവർത്തനങ്ങളിൽ നൽകുന്ന പിന്തുണയോടൊപ്പം ബിസിനസ്സ് രംഗത്ത് പുലർത്തുന്ന മികവ് കണക്കിലെടുത്താണ് മുനീറിനെ അവാർഡിനായി പരിഗണിച്ചത്.
നന്മോത്സവം 2026 എന്ന പേരിൽ ഫെബ്രുവരി ആറിന് നടക്കുന്ന നന്മയുടെ ആറാം വാർഷികാഘോഷ ചടങ്ങിൽ വെച്ച് പുരസ്കാരം കൈമാറും. റിയാദ് ഷോല മാൾ അൽവഫ അട്രിയത്തിൽ നടക്കുന്ന ആഘോഷപരിപാടികളിൽ സോഷ്യൽ മീഡിയ അനലിസ്റ്റും പ്രഭാഷകനുമായ ഡോ. അനിൽ മുഹമ്മദ് മുഖ്യാതിഥിയായിരിക്കും.
കൂടാതെ, കലോത്സവ പ്രതിഭയായ അസിൻ വെള്ളില, പട്ടുറുമാൽ സീസൺ 12 ടൈറ്റിൽ വിന്നറും ഫ്ലവർസ് ടോപ്പ് സിംഗർ ഫൈനലിസ്റ്റുമായ അസ്ന നിസ്സാം, ശിവഗിരി മഹാസമ്മേളനത്തിൽ ദൈവദശകം ആലപിച്ച് പ്രശസ്തയായ അഷ്ഫിയ അൻവർ തുടങ്ങിയവർ ആഘോഷരാവിനെ ധന്യമാക്കും.
വാർഷിക ആഘോഷങ്ങൾക്ക് സുലൈമാനിയ പ്രിൻസ് സുൽത്താൻ കാർഡിയാക്ക് സെൻ്ററിൽ ജനുവരി 30 വെള്ളിയാഴ്ച രാവിലെ 7 മണി മുതൽ സംഘടിപ്പിച്ചിട്ടുള്ള രക്തദാന ക്യാമ്പോടെ തുടക്കമാകും.
