ന്യൂയോര്‍ക്ക്: അന്താരാഷ്ട്ര വിപണിയില്‍ തുടര്‍ച്ചയായ അഞ്ചാം ദിവസവും എണ്ണവില ഇടിഞ്ഞു. രണ്ടാഴ്ചക്കിടയിലുള്ള ഏറ്റവും കുറഞ്ഞനിരക്കിലാണ് എണ്ണവില. യുറോപ്യന്‍ രാജ്യങ്ങളില്‍ കോവിഡ് രോഗികളുടെ എണ്ണം വര്‍ധിക്കുന്നതും യു.എസ് ഡോളര്‍ കരുത്താര്‍ജിക്കുന്നതുമാണ് എണ്ണവിലയെ സ്വാധീനിക്കുന്നത്.
ബ്രെന്‍റ് ക്രൂഡ് ഓയിലിന്‍റെ ഫ്യൂച്ചര്‍ വിലകള്‍ 3.74 ഡോളര്‍ ഇടിഞ്ഞ് 64.26 ഡോളറിലെത്തി. 5.5 ശതമാനം ഇടിവാണ് രേഖപ്പെടുത്തിയത്. ഡബ്യു.ടി.ഐ ക്രൂഡിന്‍റെ വില 3.80 ഡോളറിന്‍റെ ഇടിവുണ്ടായി. 5.9 ശതമാനം കുറവാണ് രേഖപ്പെടുത്തിയത്.
മാര്‍ച്ച്‌ രണ്ടിന് ശേഷമുള്ള കുറഞ്ഞ നിരക്കിലാണ് ഡബ്യു.ടി.ഐ ക്രൂഡിന്‍റെ മൂല്യം. ബ്രെന്‍റ് ക്രൂഡോയിലിന്‍റെ വില മാര്‍ച്ച്‌ മൂന്നിന് ശേഷമുള്ള കുറഞ്ഞ നിരക്കിലാണ്. യുറോപ്യന്‍ വാക്സിന്‍ നല്‍കുന്നത് മന്ദഗതിയിലായതും കോവിഡ് രോഗികളുടെ എണ്ണം വര്‍ധിക്കുന്നതുമാണ് എണ്ണവിലയെ സ്വാധീനിക്കുന്നതെന്നാണ് വിദഗ്ധരുടെ പക്ഷം.
