തിരുവനന്തപുരം: മഴ ലഭിച്ചില്ലെങ്കില് സംസ്ഥാനത്ത് ഭാഗിക വൈദ്യുതി നിയന്ത്രണം തുടരേണ്ടിവരുമെന്ന് കെഎസ്ഇബി. വൈകിട്ട് 6 മുതല് രാത്രി 12.30 വരെ പീക്ക് സമയത്ത് ഒന്നിലധികം തവണ വൈദ്യുതി നിയന്ത്രണം ഏർപ്പെടുത്തേണ്ടിവരുമെന്നാണ് കെഎസ്ഇബി അറിയിച്ചത്.കുറഞ്ഞത് 500 ഫീഡറുകള് അരമണിക്കൂർ വീതം ഓഫാക്കേണ്ട സാഹചര്യമുണ്ടാകുമെന്നും അധികൃതർ വ്യക്തമാക്കി.
പീക്ക് സമയത്തെ വൈദ്യുതി ഉപഭോഗം 1,000 മെഗാവാട്ടിലേക്ക് അടുക്കുകയാണ്. ഒരു ദിവസത്തെ ആകെ വൈദ്യുതി ഉപഭോഗം 100 ദശലക്ഷം യൂണിറ്റിലേക്ക് എത്താനും സാധ്യതയുണ്ടെന്നാണ് കെഎസ്ഇബിയുടെ വിലയിരുത്തല്. സംസ്ഥാനത്തെ പരമാവധി വൈദ്യുതി ആവശ്യകത 5,000 മെഗാവാട്ടിലേക്ക് ഉയരാനും സാധ്യതയുണ്ട്.
പവർ എക്സ്ചേഞ്ചില് നിന്ന് ആവശ്യമായ അളവില് വൈദ്യുതി ലഭിക്കാത്തതും പ്രതിസന്ധിക്ക് കാരണമാണ്. രാജ്യത്തെ വൈദ്യുതി ലഭ്യതയിലെ 12,000 മെഗാവാട്ടിന്റെ കുറവ് ഇതുവരെ പൂർണമായി പരിഹരിക്കാനായിട്ടില്ല. ദേശീയതലത്തില് വൈദ്യുതി ആവശ്യകത വർധിച്ചതോടെ പവർ എക്സ്ചേഞ്ചിലൂടെയുള്ള വൈദ്യുതി ലഭ്യതയിലും കുറവുണ്ടായിട്ടുണ്ട്.
അന്തരീക്ഷ താപനില ഉയർന്നതും മഴ മാറിനില്ക്കുന്നതുമാണ് സംസ്ഥാനത്തെ വൈദ്യുതി ഉപഭോഗം വർധിക്കാൻ പ്രധാന കാരണം. പ്രതിസന്ധി പരിഹരിക്കുന്നതിനുള്ള നടപടികള് ചർച്ച ചെയ്യാൻ കെഎസ്ഇബിയില് ഇന്ന് യോഗം ചേരും. വൈദ്യുതിമന്ത്രിയും ഉന്നത ഉദ്യോഗസ്ഥരും യോഗത്തില് പങ്കെടുക്കും.
ഉയർന്ന വിലയ്ക്ക് വൈദ്യുതി വാങ്ങി പ്രതിസന്ധി പരിഹരിച്ചാല് അതിന്റെ സാമ്പത്തികഭാരം സാധാരണ ഉപഭോക്താക്കള്ക്ക് നേരിടേണ്ടിവരുമെന്നും കെഎസ്ഇബി മുന്നറിയിപ്പ് നല്കി. മഴ ലഭിക്കുകയും വൈദ്യുതി ലഭ്യത മെച്ചപ്പെടുകയും ചെയ്താല് നിയന്ത്രണം ഒഴിവാക്കാനാകുമെന്നാണ് പ്രതീക്ഷ.
