കാസർകോട് : പന്ത്രണ്ടുകാരിയായ മകളെ നിർബന്ധിച്ച് മദ്യം കുടിപ്പിച്ചെന്ന കേസിൽ പിതാവ് അറസ്റ്റിൽ. രാജപുരം പോലീസ് സ്റ്റേഷൻ പരിധിയിലാണ് സംഭവം. പരാതി ലഭിച്ചതിന് പിന്നാലെ പിതാവിനെ വ്യാഴാഴ്ച ഉച്ചയോടെ രാജപുരം പോലീസ് അറസ്റ്റ് ചെയ്തു.
ബുധനാഴ്ച രാത്രിയാണ് പെൺകുട്ടിയെ പിതാവ് നിർബന്ധിച്ച് മദ്യം കുടിപ്പിച്ചതെന്നാണ് പരാതി. പെൺകുട്ടി ബോധം കേട്ടതോടെ സംഭവം ശ്രദ്ധയിൽ പെട്ട അമ്മ ബഹളം വെച്ച് പരിസരവാസികളെ അറിയിച്ചു. തുടർന്ന് കുട്ടിയെ കാഞ്ഞങ്ങാട് ജില്ലാ ആശുപത്രിയിൽ എത്തിച്ചു. ഇതിനിടയിൽ നാട്ടുകാർ പോലീസിനെ വിവരമറിയിക്കുകയായിരുന്നു.പോലീസും നാട്ടുകാരും ചേർന്നാണ് പെൺകുട്ടിയെ ജില്ലാ ആശുപത്രിയിലേക്ക് മാറ്റിയത്. ഇതിന് പിന്നാലെയാണ് പിതാവിനെ പോലീസ് അറസ്റ്റ് ചെയ്തത്. ഇയാൾക്കെതിരെ ജുവനൈൽ ജസ്റ്റിസ് ആക്ട് പ്രകാരം കേസെടുത്തു.
