കൊല്ലം : വിനോദ യാത്ര പുറപ്പെടുന്നതിന് മുമ്പ് ബസിന് മുകളില്‍ അപകടരമായ രീതിയില്‍ അഭ്യാസ പ്രകടനം. ടൂറിന് കൊഴുപ്പേകാന്‍ ബസിന് മുകളില്‍ കയറി നിന്നാണ് ബസ് ജീവനക്കാർ പൂത്തിരി കത്തിച്ചത്. കൊല്ലം പെരുമണ്‍ എന്‍ജിനിയറിങ് കോളജില്‍ കഴിഞ്ഞ ദിവസമാണ് സംഭവം. പൂത്തിരിയില്‍ നിന്ന് തീ ബസിലേക്ക് പടര്‍ന്നു.
വിനോദയാത്രയ്ക്ക് മുമ്പ് വിദ്യാര്‍ത്ഥികളെ ആവേശംകൊള്ളിക്കാനായിരുന്നു ബസ് ജീവനക്കാരുടെ പ്രകടനം. യാത്രയ്ക്കായി രണ്ട് കമ്പനികളുടെ ബസാണ് വിദ്യാര്‍ത്ഥികള്‍ ബുക്ക് ചെയ്തിരുന്നത്. ബസുകള്‍ തമ്മിലുള്ള മത്സരമാണ് വലിയ അപകടത്തിന് വഴിവയ്ക്കാമായിരുന്ന സംഭവത്തിലേക്ക് കടന്നത്.
തീ പടര്‍ന്നയുടന്‍ ബസ് ജീവനക്കാരന്‍ മുകളില്‍ കയറി തീ അണയ്ക്കുകയായിരുന്നു. സംഭവത്തില്‍ കോളജിന് പങ്കില്ലെന്നും ബസ് ജീവനക്കാരാണ് ഉത്തരവാദികളെന്നും പ്രിന്‍സിപ്പല്‍ പ്രതികരിച്ചു. അധ്യാപകർ വിലക്കിയിട്ടും ബസ് ജീവനക്കാർ പൂത്തിരി കത്തിക്കുകയായിരുന്നുവെന്നും അദ്ദേഹം കൂട്ടിച്ചേർത്തു.
ബസ് വയനാട് വഴി കര്‍ണാടകയിലേക്ക് പോയിരിക്കുകയാണെന്നും ഉടമയെ കണ്ടെത്തിയെന്നും മോട്ടോര്‍ വാഹന വകുപ്പ് ഉദ്യോഗസ്ഥര്‍ പറഞ്ഞു. കൊമ്പൻ എന്ന പേരിലെ ബസാണ് അപകടകരമായ അഭ്യാസപ്രകടനം അരങ്ങേറിയത്.
സംഭവത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചതോടെ മോട്ടോര്‍ വാഹന വകുപ്പ് അന്വേഷണം തുടരുകയായിരുന്നു. പൂത്തിരി കത്തിച്ചതിന് പിന്നാലെ അതിവേഗം ബസിന് മുകളില്‍ തീ പടരുകയായിരുന്നു. അടുത്തിടെ തിരുവനന്തപുരത്ത് ശബരിമല യാത്രയ്‌ക്കെത്തിയപ്പോഴും ടൂറിസ്റ്റ് ബസിനെതിരെ നടപടി സ്വീകരിച്ചിരുന്നു. കോളേജ് ടൂറിനിടയില്‍ നടക്കുന്ന ഇത്തരം അഭ്യാസ പ്രകടനങ്ങള്‍ക്കെതിരെ മുന്‍പും നടപടി എടുത്തിട്ടുണ്ട്.
By..Amaal Mariam
www.mediawings.in
