ദോഹ/റിയാദ്: പാകിസ്താനിലെ വിവിധ മേഖലകളിലായി മൂന്ന് ബില്യണ്‍ ഡോളറിന്റെ നിക്ഷേപമിറക്കുമെന്ന് ഖത്തര്‍ ഇന്‍വെസ്റ്റ്‌മെന്റ് അതോറിറ്റി അറിയിച്ചു. ഖത്തര്‍ അമീര്‍ ശെയ്ഖ് തമീം ബിന്‍ ഹമദ് അല്‍ താനിയും ഖത്തര്‍ സന്ദര്‍ശനത്തിനെത്തിയ പാകിസ്താന്‍ പ്രധാനമന്ത്രി ശഹബാസ് ശരീഫും തമ്മില്‍ അമീരി ദിവാനില്‍ നടന്ന കൂടിക്കാഴ്ചയിലാണ് ഇക്കാര്യത്തില്‍ തീരുമാനമായത്.
ഖത്തര്‍ ഇന്‍വെസ്റ്റ്‌മെന്റ് അതോറിറ്റി വഴി രാജ്യത്ത് കൂടുതല്‍ നിക്ഷേപം ഇറക്കുമെന്നും ഇരുരാജ്യങ്ങള്‍ക്കും ഇടയിലെ വ്യാപാര ബന്ധം കൂടുതല്‍ ശക്തിപ്പെടുത്തുമെന്നും ഖത്തര്‍ അമീര്‍ പറഞ്ഞു. ഇതിന്റെ ഭാഗമായാണ് ഖത്തര്‍ പാകിസ്താനില്‍ മൂന്ന് ബില്യണ്‍ ഡോളറിന്റെ നിക്ഷേപം നടത്തുന്നതെന്നും അദ്ദേഹം കൂട്ടിച്ചേര്‍ത്തു.
അതേസമയം, പാകിസ്ഥാന് ഒരു ബില്യന്‍ ഡോളര്‍ സഹായം നല്‍കാന്‍ സൗദി ഭരണാധികാരി സല്‍മാന്‍ രാജാവ് ഉത്തരവിട്ടതായി സൗദി ന്യൂസ് ഏജന്‍സി റിപ്പോര്‍ട്ട് ചെയ്തു. പാകിസ്താന്റെ സാമ്പദ് വ്യവസ്ഥയെയും അവിടത്തെ ജനങ്ങളെയും സഹായിക്കുകയെന്ന ലക്ഷ്യത്തോടെയാണ് സൗദിയുടെ സഹായ പ്രഖ്യാപനമെന്നും ന്യൂസ് ഏജന്‍സി അറിയിച്ചു.
സൗദി അറേബ്യന്‍ വിദേശകാര്യ മന്ത്രി ഫൈസല്‍ ബിന്‍ ഫര്‍ഹാന്‍ ബിന്‍ അബ്ദുല്ലയും പാകിസ്താന്‍ വിദേശ കാര്യ മന്ത്രി ബിലാവല്‍ ബുട്ടോ സര്‍ദാരിയും തമ്മില്‍ നടന്ന ഫോണ്‍ സംഭഷണത്തിലാണ് രാജാവിന്റെ സഹായ വാഗ്ദാനം പാകിസ്താനെ അറിയിച്ചത്. ഇരു രാജ്യങ്ങള്‍ക്കും ഇടയിലെ സഹകരണം മെച്ചപ്പെടുത്തുന്ന കാര്യവും ഇരു നേതാക്കളും ചര്‍ച്ച ചെയ്തു. പ്രാദേശികവും അന്താരാഷ്ട്രീയവുമായ കാര്യങ്ങളും ഫോണ്‍ സംഭാഷണത്തില്‍ വിഷയമായതായും സൗദി പ്രസ്സ് ഏജന്‍സി അറിയിച്ചു.
