റിയാദ്: സൗദി അറേബ്യയിലെ ഹഫർ അൽ ബാത്തീൻ സമീപമുള്ള മരുഭൂമി മേഖലയിലുണ്ടായ ശക്തമായ കാറ്റിലും മഴയിലും ടെന്റ് തകർന്നുവീണ് പ്രവാസി മരിച്ചു. ഉത്തർപ്രദേശ് സ്വദേശിയായ 44-കാരൻ അബ്ദുൽ മൊയ്ദീൻ ആണ് മരിച്ചത്.
പെരുന്നാളിന് രണ്ട് ദിവസം മുമ്പ് ഉണ്ടായ ഈ ദാരുണ സംഭവത്തിൽ, ഹഫർ അൽ ബാത്തീനിൽ നിന്ന് ഏകദേശം 70 കിലോമീറ്റർ അകലെയുള്ള പ്രദേശത്താണ് അപകടം നടന്നത്.
ശക്തമായ കാറ്റിന്റെയും മഴയുടെയും ആഘാതത്തിലാണ് താമസിച്ചിരുന്ന ടെന്റ് തകർന്നുവീണത്. മരിച്ച അബ്ദുൽ മൊയ്ദീൻ അവിടെ ആട്ടിടയനായി ജോലി ചെയ്തുവരികയായിരുന്നു.
സംഭവത്തെ തുടർന്ന് അധികൃതർ സ്ഥലത്തെത്തി തുടർനടപടികൾ സ്വീകരിച്ചു. പോസ്റ്റ്മോർട്ടം നടപടികൾ പൂർത്തിയാക്കിയ ശേഷം ഇന്ത്യൻ എംബസിയുടെ സഹായത്തോടെ ഒ.ഐ.സി.സി പ്രസിഡന്റ് വിബിൻ മറ്റത്ത് നിയമ നടപടികൾ പൂർത്തിയാക്കി മൃതദേഹം ഹഫർ അൽ ബാത്തീനിൽ ഖബറടക്കി.
മരുഭൂമി മേഖലകളിൽ കാലാവസ്ഥാ വ്യതിയാനങ്ങൾ ശക്തമാകുന്ന സാഹചര്യത്തിൽ കാറ്റും മഴയും ഉണ്ടാകുമ്പോൾ ആവശ്യമായ മുൻകരുതലുകൾ സ്വീകരിക്കണമെന്ന് ബന്ധപ്പെട്ട അധികൃതർ മുന്നറിയിപ്പ് നൽകി.
