റിയാദ്: കോൺഗ്രസ് പാർട്ടിയെയും പ്രവർത്തകരെയും ജീവന് തുല്യം സ്നേഹിക്കുകയും സംഘടനാ പ്രവർത്തനങ്ങൾക്ക് സമർപ്പിതമായ ജീവിതം നയിക്കുകയും ചെയ്ത ഒ.ഐ.സി.സി കണ്ണൂർ ജില്ലാ റിയാദ് മുൻ പ്രസിഡന്റ് കെ. ഒ. അബ്ദുൽ മജീദിന്റെ രണ്ടാം ചരമവാർഷികം ആചരിച്ചു. ഒ.ഐ.സി.സി കണ്ണൂർ ജില്ലാ കമ്മിറ്റിയുടെ നേതൃത്വത്തിൽ റിയാദിലെ സബർമതിയിൽ സംഘടിപ്പിച്ച അനുസ്മരണ യോഗത്തിൽ അദ്ദേഹത്തിന്റെ സംഘടനാ പ്രവർത്തനങ്ങളും സൗഹൃദവും നേതൃപാടവവും സഹപ്രവർത്തകർ അനുസ്മരിച്ചു.
ഒ.ഐ.സി.സി കണ്ണൂർ ജില്ല പ്രസിഡന്റ് സന്തോഷ് ബാബു അധ്യക്ഷത വഹിച്ച അനുസ്മരണ യോഗം സെൻട്രൽ കമ്മിറ്റി ജനറൽ സെക്രട്ടറി സക്കീർ ദാനത്ത് ഉദ്ഘാടനം ചെയ്തു. കോൺഗ്രസ് പ്രസ്ഥാനത്തോടും സംഘടനാ പ്രവർത്തകരോടും കെ. ഒ. അബ്ദുൽ മജീദ് പുലർത്തിയിരുന്ന ആത്മാർഥതയും പ്രതിബദ്ധതയും അദ്ദേഹം അനുസ്മരിച്ചു. പ്രവാസ ജീവിതത്തിനിടയിലും സംഘടനാ പ്രവർത്തനങ്ങൾക്ക് സമയം കണ്ടെത്തുകയും പ്രവർത്തകരെ ചേർത്തുനിർത്തുകയും ചെയ്ത അദ്ദേഹത്തിന്റെ പ്രവർത്തനങ്ങൾ എന്നും ഓർമിക്കപ്പെടുമെന്ന് സക്കീർ ദാനത്ത് പറഞ്ഞു.
സെൻട്രൽ കമ്മിറ്റി ജനറൽ സെക്രട്ടറി ഷംനാദ് കരുനാഗപ്പള്ളി, ഗ്ലോബൽ കമ്മിറ്റി അംഗം അഷ്കർ കണ്ണൂർ, സ്പോർട്സ് കൺവീനർ ബഷീർ കോട്ടക്കൽ എന്നിവർ അനുസ്മരണ പ്രഭാഷണം നടത്തി. കെ. ഒ. അബ്ദുൽ മജീദിനൊപ്പമുള്ള സംഘടനാ പ്രവർത്തന കാലഘട്ടത്തിലെ അനുഭവങ്ങളും അദ്ദേഹത്തിന്റെ സൗഹൃദപരമായ ഇടപെടലുകളും പ്രഭാഷകർ പങ്കുവെച്ചു.
സംഘടനാ പ്രവർത്തനങ്ങളിൽ സജീവമായിരുന്ന മജീദ് സഹപ്രവർത്തകരുമായി ഊഷ്മളമായ സൗഹൃദം കാത്തുസൂക്ഷിച്ചിരുന്ന വ്യക്തിയായിരുന്നുവെന്നും അഭിപ്രായപ്പെട്ടു. അഭിപ്രായ വ്യത്യാസങ്ങൾക്കിടയിലും വ്യക്തിബന്ധങ്ങൾക്ക് വലിയ പ്രാധാന്യം നൽകിയിരുന്ന അദ്ദേഹത്തിന്റെ സമീപനം സംഘടനാ രംഗത്ത് ഏറെ ശ്രദ്ധേയമായിരുന്നുവെന്നും അനുസ്മരണ പ്രഭാഷകർ പറഞ്ഞു.
സെൻട്രൽ കമ്മിറ്റി സീനിയർ വൈസ് പ്രസിഡന്റ് രഘുനാഥ് പറശ്ശിനിക്കടവ് അനുസ്മരണ യോഗത്തിന് ആമുഖം നൽകി. ജനറൽ സെക്രട്ടറി ഹരീന്ദ്രൻ പഴയങ്ങാടി സ്വാഗതം പറഞ്ഞു.
ഒ.ഐ.സി.സി കണ്ണൂർ ജില്ലാ കമ്മിറ്റിയെ പ്രതിനിധീകരിച്ച് മുനീർ ഇരിക്കൂർ, ഷഫീഖ് നിടുവാട്ട് എന്നിവർ കെ. ഒ. അബ്ദുൽ മജീദിനൊപ്പമുള്ള വ്യക്തിപരവും സംഘടനാപരവുമായ അനുഭവങ്ങൾ പങ്കുവെച്ച് അനുസ്മരിച്ചു. അദ്ദേഹത്തിന്റെ പ്രവർത്തന കാലഘട്ടത്തിലെ വിവിധ അനുഭവങ്ങളും സംഘടനയ്ക്കായി നടത്തിയ ഇടപെടലുകളും ഇരുവരും ഓർത്തെടുത്തു.
പ്രവാസി സമൂഹത്തിനിടയിൽ കോൺഗ്രസ് പ്രസ്ഥാനത്തിന്റെ പ്രവർത്തനങ്ങൾ ശക്തിപ്പെടുത്തുന്നതിലും ഒ.ഐ.സി.സി സംഘടനാ സംവിധാനത്തെ സജീവമാക്കുന്നതിലും കെ. ഒ. അബ്ദുൽ മജീദ് നൽകിയ സംഭാവനകൾ യോഗത്തിൽ പ്രത്യേകം പരാമർശിക്കപ്പെട്ടു. പ്രവർത്തകരോട് സൗഹൃദപൂർവം ഇടപെടുകയും സംഘടനാ കാര്യങ്ങളിൽ ആത്മാർഥമായി ഇടപെടുകയും ചെയ്തിരുന്ന അദ്ദേഹത്തിന്റെ പ്രവർത്തന ശൈലി പുതിയ തലമുറയിലെ പ്രവർത്തകർക്കും മാതൃകയാണെന്ന് യോഗത്തിൽ സംസാരിച്ചവർ അഭിപ്രായപ്പെട്ടു.
ഹാഷിം കണ്ണാടിപ്പറമ്പ് നന്ദി രേഖപ്പെടുത്തി. സുജിത് തോട്ടട, അബ്ദുള്ള കൊറളായി എന്നിവർ പരിപാടിയുടെ നടത്തിപ്പിന് നേതൃത്വം നൽകി.
