ഫുജൈറ: എമിറേറ്റിലേക്കുള്ള പ്രവേശന കവാടത്തിന് സമീപം ഷെയ്ഖ് ഖലീഫ ബിൻ സായിദ് റോഡിലാണ് ട്രക്കും നിരവധി വാഹനങ്ങളും കൂട്ടിയിടിച്ച് ഗുരുതരമായ അപകടമുണ്ടായത്. അർധരാത്രിയിലുണ്ടായ അപകടത്തിൽ നിരവധി പേർ മരിക്കുകയും നിരവധി പേർക്ക് പരിക്കേൽക്കുകയും ചെയ്തതായി ഫുജൈറ പോലീസ് അറിയിച്ചു.
പോലീസ്, ആംബുലൻസ്, സിവിൽ ഡിഫൻസ് വിഭാഗങ്ങളിലെ പ്രത്യേക സംഘങ്ങൾ ഉടൻ സ്ഥലത്തെത്തി രക്ഷാപ്രവർത്തനം ആരംഭിച്ചു. പരിക്കേറ്റവർക്ക് പ്രാഥമിക ചികിത്സ നൽകിയ ശേഷം തുടർചികിത്സയ്ക്കായി ആശുപത്രികളിലേക്ക് മാറ്റി. അപകടസ്ഥലം സുരക്ഷിതമാക്കുന്നതിനും ഗതാഗതം നിയന്ത്രിക്കുന്നതിനുമുള്ള നടപടികളും സ്വീകരിച്ചു.
അപകടത്തിന്റെ കാരണവും സാഹചര്യങ്ങളും കണ്ടെത്താൻ ബന്ധപ്പെട്ട അധികൃതർ അന്വേഷണം ആരംഭിച്ചതായി ഫുജൈറ പോലീസ് ജനറൽ കമാൻഡ് അറിയിച്ചു. മരിച്ചവരുടെ കുടുംബാംഗങ്ങളെ അനുശോചനം അറിയിക്കുകയും പരിക്കേറ്റവർ വേഗത്തിൽ സുഖം പ്രാപിക്കട്ടെയെന്ന് ആശംസിക്കുകയും ചെയ്തു.
റോഡ് ഉപയോഗിക്കുന്നവർ ഗതാഗത നിയമങ്ങളും ചട്ടങ്ങളും പാലിക്കണമെന്നും നിശ്ചയിച്ച വേഗപരിധി ലംഘിക്കരുതെന്നും വാഹനങ്ങൾക്കിടയിൽ സുരക്ഷിത അകലം നിലനിർത്തണമെന്നും പോലീസ് അഭ്യർഥിച്ചു.
അപകടത്തിൽ മരിച്ചവരുടെയും പരിക്കേറ്റവരുടെയും എണ്ണം, അവരുടെ ദേശീയത തുടങ്ങിയ കാര്യങ്ങൾ സംബന്ധിച്ച് അഭ്യൂഹങ്ങളോ സ്ഥിരീകരിക്കാത്ത വിവരങ്ങളോ പ്രചരിപ്പിക്കരുതെന്ന് പോലീസ് പൊതുജനങ്ങൾക്ക് പ്രത്യേക മുന്നറിയിപ്പ് നൽകി. വിവരങ്ങൾ ഔദ്യോഗികവും വിശ്വസനീയവുമായ ഉറവിടങ്ങളിൽ നിന്ന് മാത്രം സ്വീകരിക്കണമെന്നും നിർദേശിച്ചു.
സംഭവത്തെക്കുറിച്ചും അതിന്റെ സാഹചര്യങ്ങളെക്കുറിച്ചുമുള്ള അന്വേഷണം തുടരുകയാണെന്നും വിവരങ്ങൾ പരിശോധിച്ച് ഔദ്യോഗികമായി സ്ഥിരീകരിച്ച ശേഷം പുറത്തുവിടുമെന്നും ഫുജൈറ പോലീസ് ജനറൽ കമാൻഡ് അറിയിച്ചു.
