കൊല്ലം: പത്തനാപുരം ചെലവന്നൂരിൽ വാഹനാപകടത്തിൽ രണ്ട് ബൈക്ക് യാത്രികർക്ക് ഗുരുതര പരിക്ക്. റോഡരികിലെ മൺകൂനയിൽ തട്ടി നിയന്ത്രണം വിട്ട ബൈക്ക് കെഎസ്ആർടിസി ബസിൽ ഇടിക്കുകയായിരുന്നു. ഓട നിർമിക്കാനായി കുഴിയെടുത്ത ശേഷമുള്ള മണ്ണാണ് റോഡരികിൽ കൂട്ടിയിട്ടിരുന്നത്. കമുകുംചേരി സ്വദേശികളായ രണ്ടു യുവാക്കളാണ് അപകടത്തിൽപ്പെട്ടത്.
കടയ്ക്കാമൺ ഭാഗത്ത് ആഴ്ചകൾക്ക് മുൻപ് ഓട നിർമാണം നടന്നിരുന്നു. നിർമാണ പ്രവർത്തനത്തിൻ്റെ ഭാഗമായി മണൽ കൂട്ടിയിട്ടിരുന്നു. കഴിഞ്ഞ ദിവസങ്ങളിൽ പ്രദേശത്ത് ശക്തമായ മഴയാണ് പെയ്തത്. മഴയെ തുടർന്ന് മണ്ണൊലിച്ച് റോഡിലേക്ക് ഇറങ്ങിയിരുന്നു. ഇതും അപകടത്തിന് കാരണമായെന്ന് നാട്ടുകാർ പറഞ്ഞു.
ഓട നിർമാണത്തിലെ അശ്രദ്ധയാണ് അപകട കാരണമെന്നും നാട്ടുകാർ ആരോപിച്ചു. അപകടത്തിൽപ്പെട്ട യുവാക്കളുടെ തലയ്ക്കാണ് പരിക്കേറ്റത്. നിർമാണ പ്രവർത്തനങ്ങളുടെ പേരിൽ റോഡിൽ സാധന സാമഗ്രികൾ ഇറക്കിവെക്കുന്നതും അപകടങ്ങൾക്ക് കാരണമാകുന്നുണ്ട്. പരിക്കേറ്റ ഇരുവരേയും തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
