മലപ്പുറം : ആശുപത്രി കെട്ടിടത്തിന് മുകളിൽ കയറി ആത്മഹത്യാഭീഷണി മുഴക്കിയ യുവാവിന് രക്ഷകരായി മലപ്പുറം അഗ്നി രക്ഷാസേന ഉദ്യോഗസ്ഥർ. ചങ്കുവെട്ടിയിലെ സ്വകാര്യ ആശുപത്രി കെട്ടിടത്തിന്റെ ആറാം നിലയ്ക്ക് മുകളിൽ കയറിയാണ് യുവാവ് ആത്മഹത്യാ ഭീഷണി മുഴക്കിയത്. മാനസികാസ്വസ്ഥതയുള്ള യുവാവ് വിഷം കഴിച്ചതിനാൽ ഭാര്യയോടൊപ്പം ചികിത്സക്ക് വേണ്ടി ആശുപത്രിയിൽ എത്തുകയായിരുന്നു രാത്രി 11 മണിയോടെ ആണ് ഐസിയുവിൽ നിന്ന് യുവാവ് ഓടിപ്പോയി ആശുപത്രിയുടെ മുകളിൽ കയറിയത്.
കെട്ടിടത്തിന്റെ ഷീറ്റ് മേഞ്ഞ ഭാഗത്തെ സീലിംഗ് പൊളിച്ചുമാറ്റി അകത്തു കയറി, അതിനുള്ളിലൂടെ പുറത്തെ അപകടകരമായ ചെരിഞ്ഞ സൺഷേഡിലേക്ക് ഇറങ്ങിയാണ് യുവാവ് ആത്മഹത്യാഭീഷണി മുഴക്കിയത്. തുടർന്ന് ഇയാളോട് നാട്ടുകാരും ആശുപത്രി അധികൃതരും താഴെ ഇറങ്ങാൻ ആവശ്യപ്പെട്ടെങ്കിലും തയ്യാറായില്ല. ഉടൻ തന്നെ അധികൃതർ മലപ്പുറം അഗ്നിരക്ഷാനിലയത്തിൽ വിവരമറിയിക്കുകയും സേന(Malappuram Fire Force) എത്തി നാട്ടുകാരുടെ സഹായത്തോടെ താഴെ വല വിരിക്കുകയും ചെയ്തു.
ശേഷം കെട്ടിടത്തിന് മുകൾ നിലയിൽ കയറി സേനാഗംങ്ങൾ ഒന്നര മണിക്കൂർ നീണ്ട ശ്രമത്തിനൊടുവിൽ യുവാവിനെ അനുനയിപ്പിച്ചു. തുടർന്ന് ശാന്തനായ ഇയാളെ കയറിന്റെയും സുരക്ഷാ ബെൽറ്റിന്റെയും സഹായത്തോടെ ഉള്ളിലേക്ക് കയറ്റാൻ ശ്രമം നടത്തിയെങ്കിലും വിജയിച്ചില്ല. തുടർന്ന് വെന്റിലേഷനിലൂടെ കൈ പിടിച്ചു അകത്തു കടത്തുകയായിരുന്നു. ഇതോടെയാണ് മണിക്കൂറുകളോളം നീണ്ട പരിഭ്രാന്തിക്ക് അവസാനമായത്.
